Mise à jour : 23/07/2008 14:50:31
AIR: DE BACCHUS A L'AMOUR
PRUMI COPLET
Vola co les fosswets cor on cô en déroute
C’est des droles di cadets on cô qui l’molon s’boudge
I n’faienu pupon d’bin on vet qu’ça les quèquie
Dispu tot au matin po plu fé leu sortie
Refrain
Allons tos les chinels fio ranchi vos galzienn’s
C’est l’djou do Lætare i faut sawè sabrer
Euchi sogn’ tin-z’in-tin d’lètchi on p’tit verquin
Ca r’tchauff’ les intestins po r’comminci l’lèdmoin
II
L’dimègne après grand’messe li tambour bat l’rappel
Po qu’on stègn’ tortos prét qu’i n’manqu’nin on chinel
Qu’on waite di vôie Gosset d’vant d’comminci l’djournée
Po qu’i n’die nin « Varzet » d’vant l’londi al’ vesprée
III
Din l’reuw’ di Vietrivaux c’est là qu’on s’rèunit
Po danser l’prumi saut d’vant l’major Ann’dèri
I pass’nu l’inspection zell deux l’vie capitaine
On djoue on rigodon i danss’nu co tol’minme
IV
Arrivé su l’Martchi on djoue l’air des chinels
Jésus Maria Dèi qué comellée int’ zell’s
Saut’lé out’ des boleaux gripé jusqu'à sul’pompe
Et sautlé d’on plein saut din l’reuw del poit’ al Vaux
V
Li doudou ès l’vie Crame fi Joirlette ès Morel
Vôront co fé d’leu crâne cont’ tos les ôtes chinels
I l’auront foit à fé si s’rait on’ deur’ djournée
Dji crwet qui l’auront co cont’ zell’s li blanc Wiot
VI
Es mon Neuche,i gna co vailà onn’ drôl’ di sosse
Gna jusqu’à do Congo vinu exprès à fosses
On l’aprind à danser dispus trois quat’ samoinnes
Mais quand c’est po sabrer ca il fait bin li minne
VII
Li londi al viesprée po z’achèver l’djournée
On pass les examens po m’grand’ médaille d’ardgint
L’sia qu’aurait l’prumi prix gangn’rait onn’ bonne djournée
Pôrait spasser l’verdi d’aller fé s’grand’ tournée
VIII
Les memb’s dèl commission ont bin rindu des poinn’s
Fé des réunions tos les djous dèl sammoinn’
Es mi dj’a fait l’tchanson en toirchant li p’tit’ gott’
Cur’ deux ous din l’pailon li lendmoin d’onn’ ribotte
DERIN COPLET
On bossu, on chalé ca c’est cor onn’ bell’ cope
I sont bin rescontrés i n’leu manque pu qu’one hott’
Ca po vinte des tchansons zè trouver deux parèyes
I fauréfe aller long co pu long qu’Nèvrumont
François GAILLY
AIR: A plein vents mes bons amis.
PRUMI COPLET
S’esst audjourdu li pu bia d'jou d’lannée
Tot les Fosswets sèront co dins l'traien
I passront co deux trois belles d'journées
Mais po 1'maurdi branmin auront l’balzin.
REFRAIN
A plein verr' bèvant tortos
Bèvant tortos
C'est l'laetare t’chantant tortos èchon
A plein verr’bèvant tortos
Bèvant tortos
Po l'saut d’chinel faut boir'on verr' di trop.
II
Comm’ tot les ans, li tambour bat l’rappel
Po s’rassembler divant mon Ann'dèri
Li commission avous tot les chinels
Comminss'nu d'ja à fé danser les p’tits
III
Sestt’on plaigi d’les vôye tortos echonn’
Gnaurait d’quèt rir’ quand on vièret l’grand Yen
I fait des sauts’ i vos abann' onn' homme
C'est bin dazard sinn’ fait nin l’picottin
IV
D'su l’Martchi sess’t onne vraie comèlée
On pôrait bin prinde des grandes précautions
Principalmint po les djonn’ commér’
Ca poref bin ni rin amoin’ner d’bon
V
On monte li Tchapitt’on va fer l’tour del pomp’
On fait onn’ halte, on danse on rigodon
Vo les vierros, i gnenn’a deux dins l’nomb’
Tâche el’ Tidart vont sautler au pu long
VI
Puis al Goëtte si s’rait onn’ ôt’histoère
Sesst on’ assaut ou’on n’a nin co vèyu
Li Rouche Noulard vous fé tant d’affaires
Dji croèt qui l’Couss’ l’aurait vite rascoudu
VII
L’londi au matin, po r’commincit l’djournée
Onss' ramoncelle, on laume saquants verquins
Onss’met en route avou l’tiesse estchauffée
Les clonn’ vont fé assoti l'grand Kaisin.
VIII
Dissu l’Marchi, li londi al’viesprée
Po zachèver on passe les examens
C’est là seul’mint qu’après deux deur’ djournées
Gnaurait qu’iront trouver li pharmacien
IX
Pol prûmi prix, si s’rait one grande surprise
Li cia qu’l’aurait pou dire qui l’est chapè
I s’rait saisi, s’inn’t’chait nin din onn’ crise
I s’rait todis fameusmint stomaqué
X
Li Blan Pajan avou s’djamb’ tote chalée
A yeu l’maleur di piètt’ li p’tit bossu
Mais avou Det, li cope n'est nin gâtée
Ça co bin sti d’hasard di r’t’chair’ dissus
François GAILLY. 1872
